Zindagi ka Safar: Bachpan ki Masoomiyat se Budhape ki Zimmedariyon Tak

Dosto, aaj hum share kar rahe hain ek aisi kavita jo har kisi ke dil ko chhu legi. Yeh zindagi ke us safar ko dikhati hai jise hum har roz jite hain.

Zindagi — Bachpan se Budhape Tak

Kabhi hum mitti mein khelkar hath gande kiya karte the,
Aaj wahi hath zimmedariyon se thakkar kaanp jaya karte hain.

Kabhi chhoti si chot par poora ghar sir par utha lete the,
Aaj bade-bade dard bhi chupchap sah jaya karte hain.

Kabhi rote the khilona tootne par,
Aaj rishte tootein to bhi muskura dete hain...

Kabhi maa ki ungli pakadkar duniya dekhi thi humne,
Aaj usi maa ka sahara bankar use dheere-dheere chalte dekhte hain.

Waqt ne kitna badal diya humein,
Kal tak jo befikr the, aaj aaine mein safed baal dekhkar khud se hi dar jate hain.

Bachpan mein jaldi bade hona chahte the,
Ab budhape mein bachpan dhoondte rah jate hain...

Zindagi sach mein ajeeb safar hai — Aankh khulte hi shuru hoti hai, aur pata hi nahi chalta kab yaadon mein badal jaati hai...